Kyrkjemøtet sitt vedtak

1. Kyrkjemøtet fastset vedlagte tenesteordningar for diakon, kantor og kateket, gjeldande frå 1. januar 2005. Desse avløyser tenesteordningane frå 1996.

2. Kyrkjemøtet opphever frå 1. januar 2005 ”Retningsliner for dei gudstenestlege funksjonane til kantoren”, vedtekne av Kyrkjemøtet 1999.

3. Retningsliner om bruk av tenestedrakt for kantor vert tekne inn i ”Rettleiing om bruk av liturgisk drakt” i gudstenesteboka.

4. Kyrkjemøtet ynskjer å leggje til rette for større breidd i kyrkjas musikalske liv. Kyrkjemøtet ber difor Kyrkjerådet vurdere å godkjenne musikkutdanningar som er fagleg jamgode med kantorutdanning, som normale kvalifikasjonskrav til kantorstilling.

5. Kyrkjemøtet delegerer til Kyrkjerådet mynde til å utarbeide regelverk etter EØF- rådsdirektiv nr 89/48 for godkjenning av utanlandsk kvalifikasjon som grunnlag for tilsetting i Den norske kyrkja, og til å gjere einskildvedtak om autorisasjon, jf. kyrkjelova §24 tredje ledd bokstav c.